Wednesday, January 27, 2010

త్వరలో "న్యూ" రిలీజ్


Wednesday, January 20, 2010

ద్రౌపది - రచనలో లేని అర్థాలు ఆపాదిస్తే ఎలా?


Friday, January 15, 2010

యార్లగడ్డ ‘ద్రౌపది’ పై విమర్శలు


మొన్న ఒక చర్చలో ‘తెలుగు సాహిత్యానికి తగిన గుర్తింపు భారతదేశంలో రాలేదేమిటి చెప్మా?’ అని నిట్టూర్పువిడిస్తే, ‘నూతిలోంచీ ఎగబాకే కప్పను లాగి మళ్ళీ క్రిందపడదోసే జాతి సాహిత్యానికి ఎట్లా గుర్తింపు వస్తుంది?’ అని ప్రశ్నించి నా నిట్టూర్పుని కాస్తా నిస్పృహగా మార్చేశారు. అప్పుడే విన్నాను యార్లగడ్డ లక్ష్మీప్రసాద్ "ద్రౌపది"కి సాహిత్య అకాడమీ పురస్కారం లభించింది అని. విన్న క్షణం నుంచే అప్పటినుంచీ ఆ పుస్తకాన్ని గురించి ఎక్కడా చర్చించని సాహితీప్రియులందరూ పరమచెత్త పుస్తకం అంటూ సాంప్రదాయాన్ని భుజాన వేసుకుని బయల్దేరారు. అప్పటివరకూ నిద్రపోయిన పండితులు హఠాత్తుగా విమర్శలు గుప్పించడం మొదలెట్టారు. ఏకంగా మానవహక్కుల కమిషన్ కు "మా మనోభావాలు దెబ్బతీస్తోందహో" అని ఏకరువుపెట్టి అవార్డుని ప్రస్తుతానికి ఆపించడంమే కాకుండా ఆ పుస్తకం ఇతరభాషల్లో అనువదించకూడదనే డిక్రీ పట్టుకొచ్చి సంస్కృతిని రక్షించేశారు.

నేను యార్లగడ్డ రాసిన పుస్తకం చదవలేదు. ఇప్పుడు ఖచ్చితంగా చదువుతాను. ఈ గొప్పోళ్ళ విమర్శలకు సమాధానం చెప్పడానికి ఏమీ చదవక్కరలేదు. కూసింత ఇంగితజ్ఞానం ఉంటే సరిపోతుంది.

సంస్కృతీ రక్షకుల విమర్శలు:

"1. ఇది ఒక బూతు పుస్తకం. వెయ్యేళ్ల తెలుగు సాహిత్య చరిత్రలో తెలుగు సరస్వతికి ఇటువంటి అవమానం, పరాభవం, కీడు, అపరాధం, అపచారం ఎన్నడూ జరగలేదు.న్యాయనిర్ణేతలే ఈ ప్రశ్నలకు సమాధానం చెప్పాలి సాహిత్య అకాడమీ ఈ విషయాలు గ్రహించి పునరాలోచించి ‘ద్రౌపది’ గ్రంథ పురస్కారానికి అనర్హమైనదిగా ప్రకటించాలి."

ఐదు భర్తలున్న ద్రౌపది మడిగట్టుకుని కూర్చోకుండా, ఆ ఐదుగురితోనూ సుఖించింది అని పుస్తకంలో వర్ణనలున్నాయి కాబట్టి ఇది బూతు పుస్తకం అనేది వీరి వాదన. ద్రౌపది వాళ్ళతో సంబోగించకుండానే అందరికీ పిల్లల్ని కన్నదా? ఇందులో అసహ్యించుకోవలసింది "పవిత్రతకు" భంగం కలిగించే విషయం ఏముంది? బూతు పుస్తకమట! ఎక్కడ లేదు బూతు? ఈ వర్ణనలే బూతైతే, రతిభంగిమలు నలుదిక్కులా ఉండే దేవాలయాలు బూతుకాదా! సమాగమనానికి ప్రతీకైన శివలింగం బూతుకాదా!!

సాంప్రదాయాన్ని వ్యతిరేకించి మనుషుల్ని మనుషులుగా ముఖ్యంగా స్త్రీలను స్త్రీగా చూడాలన్న ప్రతి వ్యక్తి సాహిత్యాన్నీ "బూతు" అన్న ఈ ఛాంధసవాద తిరోగమనవాద ఛండాలురకు గౌరవమిచ్చి సాహిత్య అకాడమీ పునరాలోచించాలా? ఈ పుస్తకం అనర్హమైనదిగా ప్రకటించాలా? ఎవరండీ ఈ సంస్క్కతిని కాపాడేందుకు కంకణం కట్టుకున్న గొప్పోళ్ళు...నిజమైన సమస్యలొచ్చినప్పుడు వీళ్ళెక్కడా కనిపించరే!!!


"2. ద్రౌపదిని శ్రీకృష్ణుని ఇష్టసఖిగా రచయిత అభివర్ణించాడు. ఇష్టస అంటే ప్రియురాలు, వలపుకత్తే, ప్రేయసి అనే అర్థాలు ఉన్నాయి. కాని చెల్లెలు అనే అర్థం ఉందా?"

సఖి-సఖుడు అనేది భక్తి సాంప్రదాయంలో ఒక విధానం. దేవుడ్ని కొలవడంలో అదొక ప్రత్యేకతరహా. ఇప్పుడు మనం platonic relationship అంటామే ఆతరహా. ఆ అర్థం,చరిత్ర మనోళ్ళకు తెలీదుగానీ ప్రస్తుతానికి "సఖి" అంటే ప్రియురాలు అనే అర్థం ఉందికాబట్టి ద్రౌపదికీ కృష్ణుడికీ రచయిత రంకు అంటగట్టాడనే అపోహతో వీళ్ళు తమ మనసుల్లోని కుతిని తీర్చుకుంటున్నారేతప్ప మరొకటి కాదు.


"3. ఐదుగురు కొడుకులను పోగొట్టుకొని (సుషుప్తి పరవశులైన బాలకులను అశ్వత్థామ గొం తులు కోసి చంపాడు) గోలుగోలున ఏడుస్తున్న ద్రౌపది, పూర్వం తనకు జరిగిన అన్యాయాలను తలచుకుంటూ వెంటాడే స్మృతులలో దుర్యోధనుడు కామంతో తన ఎత్తైన వక్షస్థలాన్ని చూస్తున్న సంగతి గుర్తుచేసుకోగలదా?"

ఎందుకు గుర్తుచేసుకోకూడదూ...ఎవరైనా స్త్రీని బస్టాండుల్లో,ఆఫీసుల్లో, రోడ్డు మీద కళ్ళతో గుచ్చిగుచ్చి చూసి రేప్ చేసే మీలాంటి దౌర్భాగ్యులపై ఎంత అసహ్యం ఉంటుందో ఒకసారి అడిగి కనుక్కోండి. ఈ నీచత్వం వాళ్ళ మనసుల్ని ఎంతగా గాయపరుస్తుందో తెలుసుకోండి.


"4. ద్రౌపది ఒకరోజు తరువాత ఒకరోజు పాండవులు ఒక్కొక్కరితో కామకేళీ విలాసాలతో సుఖించినట్లు, పరవశత్వం చెందినట్లు వక్రీకరణలు గొప్ప పరాభవము, మానభంగము కావా?"

హన్నా... మొగుళ్ళతో సుఖించడం కూడా పరాభవమా! ఆ సుఖంలో పరవశత్వం చెందడం మానభంగమా! ఎవరండీ ఈ కేతిగాళ్ళు? ఈ సాంప్రదాయవాదులు ఇప్పటికే స్త్రీలని ఎన్నో మానసిక సంకెళ్ళలో బంధించారు. వీలైతే ఇలాంటి వాదనలతో యోనులకు తాళాలు వేస్తామన్నా అంటారు. ఛత్!!


"5. శ్రీకృష్ణ పరమాత్మను అతి నీచంగా ప్రస్తావించటం కృష్ణభక్తులైన ఆనందవర్ధనుడు, ఆచార్య శంకరభగవత్పాదులు, సూరదాసు, మీరాబాయి, చైతన్య మహాప్రభువు, శ్రీరామకృష్ణపరమహంస, లీలాశకుడు, జయ దేవుడు, విద్యావతి, చండీదాసు, నారాయణతీర్థుల వంటి మహానుభావులను అవమానించడం కాదా?"

పైన చెప్పినవాళ్ళందర్నీ అప్పటి సాంప్రదాయవాదులు వ్యతిరేకించారు(కొందర్ని పిచ్చోళ్ళని కూడా ముద్రవేసారు). ఆ తరువాత తప్పనిసరి పరిస్థితుల్లో అంగీకరించారు. కాబట్టి వాళ్ళకు కొత్తగా జరిగిన అవమానం ఏదీ లేదు. కృష్టుడు అల్ట్రా మాడ్రన్ పాత్ర.  ఆపాత్ర చేసినవన్నీ established నైతికతకు అందని గిమ్మిక్కులే. ఉచ్చనీచాల ప్రస్తావన ఆపాత్రకే అవమానం.

****

Wednesday, January 13, 2010

"న్యూ" ప్రమోషనల్ బ్రోచర్

Brochure

Tuesday, January 12, 2010

డి.టి.ఎస్. లో "న్యూ"


Wednesday, January 6, 2010

నాన్న చెట్టు - ప్రసాదమూర్తి కవిత్వం



మిత్రులు ప్రసాదమూర్తి కవిత్వం గురించి ఏమని చెప్పాలి?
కవిత లేకపోతే రోజుగడవని వాడు...ఒక పుస్తకం పుట్టకపోతే పుట్టినరోజు జరుపుకోనివాని గురించి ఏమని చెప్పాలి?
ఈ సంవత్సరం పుట్టినరోజునాటికి "నాన్న చెట్టు" పుట్టింది.
అందులోని కొన్ని పంక్తులే తన కవిత్వానికి ప్రమాణాలు...చదవండి.
పుస్తకాన్ని మాత్రం కొని చదవండి.


నేను సముద్రాన్నయితే...
సముద్రం నా ముందు కూర్చుంటుంది.
వేల సంవత్సరాల జ్ఞాపకాలేవో...ఇసుకరేణువులై
నాలో మేటవేస్తుంటే
తరంగాలు తరంగాలుగా నేను పడిలేస్తుంటాను
సముద్రం  పకాలున నవ్వుతూ
పాతముచ్చట్ల మూట విప్పుతుంది
 (పేజి1 : విశాఖ తుంపర)


రెండుగంటల విధ్వంసం
రెండు దశాబ్దాల విచారణ
తూర్పు సింహాసనంపై
సూర్యుడు తీర్పు ప్రకటిస్తాడు
గాల్లో కదలుతున్న బాధితులు
పడమటి కోండలకు
తలలు బాదుకుంటారు
దోషులు రాత్రి పార్టీలో
సూర్యుడి నెత్తిమీద
చుక్కల్ని కుమ్మరిస్తారు
ప్రజాస్వామ్యం బురుజు చుట్టూ
చీకటి పహరా


(పేజి: 64, లిబర్ హాన్)

ఆకాశమంత మచ్చ
ఏ వెలుగు నీళ్ళతో కడిగేయగలం?
విలువల కోసం కలలుకనే కళ్ళల్లో
ఇక నీ ముఖమే
గడ్డకట్టిన అశ్రుకణమై తిరుగుతుంది

(పేజి:102, బిల్కిస్ బానో)


జాగ్రత్త గురూ
రెచ్చిపోయి నీదేశం దరిద్రాన్ని అక్షరీకరిస్తానేమో..
పేట్రేగి నీదేశం మత హింసను
రంగుల్లో దృశ్యమానం చేస్తావేమో
ఆందోళనతో నీదేశంలో అన్యాయాలను...అక్రమాలను
ఖండిస్తూ నిప్పుల సంగీతమై మండిపోతావేమో..
జాగ్రత్తరా బాబూ!
దేశభక్తులకు ఆగ్రహం వస్తుంది
నిన్ను దేశద్రోహిగా చిత్రీకరించి చించిపారేస్తారు

నీకళ్ళముందు మురికిని మిన్నేటి పరికిణిలా వర్ణించాలి
నీ ముందు పడివున్న భిక్షు వర్షీయసిని
ఐశ్వర్యరాయ్ గానో...శిల్పాశెట్టిగానో అభివర్ణించాలి..
భద్రం తమ్మీ!

(పేజి: 54, కల్చర్ డాగ్)


నిన్ను తెరవకుండా ఉండలేను
కానీ మూయకుండానూ ఉండలేను
జ్వరం ఒంటిమీద అమ్మచేతి స్పర్శవు నువ్వు
స్కూలు బస్సులోంచి టాటా చెప్తున్న
పిల్లల నవ్వు కళ్ళకాంతివి నువ్వు
దాహంగా ఉన్నప్పుడో...ఆకలేసినపుడో 
నీటికోసమో అన్నం కోసమో కాదు..
నీకోసమే చూస్తాను
నువ్వున్నావన్న నమ్మకంలోనే కాని..
ఈ ఊపిరిలో ఇంత వెచ్చదనం ఎక్కడిది?

(పేజి: 25, కవిత్వం)


రాత్రి కలలో తడిసిన అక్షరాలు
పొద్దున్నే నీరెండలో ఆరబోశాను
కోటి అంచుల జలఖడ్గ ప్రహారానికి
ముక్క ముక్కలైన నా దేహమే కనిపించింది.
ఒక అవయవాన్ని ఆదుకోడానికి
మరో అవయవం తాపత్రయం
కొట్టుకుపోవడమేగా తెలిసింది
ఏ చెట్టుకో చిక్కుకున్న నాకోసం నేనే ఆర్తనాదాలు

(పేజి:3, అశ్రుదేహం)


పుస్తకం : నాన్న చెట్టు (ప్రసాదమూర్తి కవిత్వం)
ప్రచురణ: వున్నూత్న ప్రచురణలు
ధర: 75 /- 
కాపీలకు: విశాలాంధ్ర, ప్రజాశక్తి,నవోదయ,నవయుగ,దిశ దుకాణాలు


****